Friday, December 10, 2021

සීත උක්‍රේනයේ සුමුදු සැඳෑවක් 3

"විසිනව වසක් හද​ ගැඹුරෙහි මිහිදන්වූ, ආගන්තුක පරිසරයක, ජාත්‍යන්තරව​ සිදුවුනු ප්‍රේම පුරාණයක සිහිවටන, ඒ සැටිම ඔබ වෙත තිළින කරන්නේ, ඒ පසු වුනු,  සුන්දර අතීතය තුල ​ඔබද රඳවාගන්නයි'

"මා මියයා හැකි මුත්, මගේ අතීතය මියයා යුතු නැත"

සීත උක්‍රේනයේ සුමුදු සැඳෑවක් 2


ෆේජි !

(පරිච්චේදය) 3

ඕං ඉතිං කාමර අංක 4, කතාවේ හැටියට ඔය කාමරයේ ඉන්න ඕනේ මම නේ හරිනං! ඕං එහෙනං, ඔය කාමරය අයිති එක්කෙනා.

ඒ තමයි ‘රියාල්’ අපේ ලංකාවේ සම්මන්තුරේ පැත්තෙන් ඇවිත් හිටිය 'රියාල්' මට වඩා අවුරුදු අටකින් විතර වැඩිමල්.

රියාල් 'අකදේමියා'(ඇකඩමි) වේ මට අවුරුද්දක් ඉදිරියෙන් සිටියේ. කොට මහත​, කකුලේ තිබුනු ගල් තැලුම් නිසා අමාරුවෙන් ඇවිදින රියාල්​, පෙනුමක් ඇති පුද්ගලයෙක් නොවූවේය​.

ඔය කාමරය වගේම ඔය කාමරයේ තිබූ බඩු බාහිරාදිය​ සියල්ල රියාල්ගේ ඒවාම විය​. රියාල් අහිංසකයෙක්.

ඔය කෝම්නතය​(කාමරය​) රියාල්ගේ නම්, මම කොහොමද ඔතෙන්ට ආවේ​​? ඒ වග කියන්න නම්, තව විශේෂ පුද්ගලයෙක් ගැනත් කියන්න වෙනවා.

ඒ තමයි 'ෆේජි' (ඒ ෆේජී, තමාට තමාම තියාගත්තු නමක්) හැදුනු වැඩුනු ෆෙජීගේ වයස අවුරුදු 21යි. ආවේ අක්කරෙයිපත්තුවෙන්.

ෆේජීයි මමයි උක්‍රේනයට ආවේ එකටයි​. ෆේජිගේ අප්පච්චි පුත්තන්ඩියාව බලා ගන්න කියලා මටයි බාර දුන්නේ. ලංකාවේ දී ෆේජි හිටියේ නිකං හාවෙක් වගෙයි.

ආවායින් පස්සේ නේ වැඩේ තේරුනේ, ඕකා නාහෙට අහන්නැති එකෙක්.1993 දෙසෙම්බරයේ අකදේමියාවට ලියාපදිංචි වුනු අපි දෙන්නටම​ ලැබූනේ 3 වන එතාෂ්zෂ් (මහල​) යේ කාමරයක්.

ලංකාවෙන් අරගෙන ගිය බඩු බාහිරාදිය පිළිවෙල කරගෙන අපි එහේ නැවතුනා.

මේ ‘ෆේජී’ එක තැන හිටියේ නෑ, ආපූ දවසේ ඉඳලම මූ එහේ මෙහේ යනවා, බීගෙන ඇවිත් මග්නිතෆෝනය (හයිෆයි සෙට් එක) දාගෙන නටනවා.

රුසියානු අකුරක් ඉගෙනගෙන නෑ (රුස්කීන්ට සාමාන්‍යයෙන් ඉංග්‍රීසි බෑ) රුස්කී කෙල්ලෝ කාමරේට එක්කං එනවා.​ සිංදු අහන්න, ජීවිතය විඳින්න මාත් කැමැතියි, ඒත් මූ වගේ බෑ.

මට ෆේජී එක්න ඉන්න එක වදයක් උනා. පියා බාර කලාට, මට බැරිවුනා ඕකව මෙල්ල කරන්න.​ කියන දෙයක් අහන එකෙක් නෙමෙයි මේකා.

ඕකා zසියාඩ්ට අන්තයි. ඇවිල්ල සතියක් යන්ට මත්තෙන් හැම දේම පටං අරං. වසවර්තියත් එක්ක සතියකට වඩා මට ඉන්න බැරිවුනා.

මම කාමරය ඔහුටම දීලා ගියා රියාල්ගේ කාමරේට​. දෙකාන් (පරිපාලක​) ට කියල කාමරයක් ඉල්ල ගන්නකං රියාල් එක්ක ඉන්නම් කියලයි මගේ අදහස තිබුනේ.

රියාල්ගේ අකැමැත්තක් තිබුනෙත් නෑ ඔකට, කොහොමටත් රියාල් අහිංසකයා නේ. මම රියාල්ගේ බඩු මුට්ටු පාවිච්චි කලා වගේම​ කෑම​ වියදමේ ලොකු හරිය මම කලා.

ඒක රියාල්ට සහනයක් වුනා, එයින් ඔහු සතුටු වුනු බවත් මට තේරුම් ගියා.

එහෙයින්, වරදකාරී හැඟීමක් නැතිව දිගටම එහේ නවතින්නත් ​මට පුළුවන් වුනා. අනික, අපි දෙන්නට අනෙක් උවමනාවනුත් නොතිබුනු නිසා, තනි කාමර සොයාගෙන යන්න තිබුනු උවමනාව මට නැතිවම ගියා.

පසු කාලෙක 'යානා' කියල පොඩි හුරුබහුටි කෙල්ලෙක් එක්ක ෆේජී යාළුවුනා. ඇය සමඟ කාලයක් ෆේජී එකට සිටිය බව මට මතකයි. සුදෝ සුදු බෝනික්කියක් වගේ හිටි යානා තම 14 වෙනි උපන් දිනය සැමරුවේ ෆේජී සමඟ ඔහුගේ කාමරයේයි. එම උපන් දින සැමරුමට අමුත්තෙක් ලෙස මාද සහභාගී වුනා.


(ඉතිරිය සීත උක්‍රේනයේ සුමුදු සැඳෑවක් 4)

No comments:

Post a Comment